|
УТРЕННЕЕ МОЛИТВЕННОЕ ПРАВИЛО Священник, возглас: Благословен Бог наш... Дежурный чтец: Молитвами святых отец наших, Господи Иисусе Христе Боже наш, помилуй нас.
Поем: АМИНЬ.
Священник: Слава Тебе, Боже наш, слава Тебе.
Поем: Царю Небесный, / Утешителю, Душе истины, / Иже везде сый / и вся исполняяй, / Сокровище благих / и жизни Подателю, / прииди и вселися в ны, / и очисти ны от всякия скверны, // и спаси, Блаже, души наша. (Аще Пасха, по Аминь поем: "Христос Воскресе…" трижды, до отдания, "ЦАРЮ НЕБЕСНЫЙ" не поется).
Чтец: Святый Боже, Святый Крепкий, Святый Безсмертный, помилуй нас (трижды). Слава Отцу и Сыну и Святому Духу, и ныне и присно и во веки веков. Аминь. Пресвятая Троице, помилуй нас, Господи, очисти грехи наша, Владыко, прости беззакония наша, Святый, посети и исцели немощи наша Имене Твоего ради. Господи, помилуй (трижды). Слава Отцу и Сыну и Святому Духу, и ныне и присно и во веки веков.
Поем: АМИНЬ. Отче наш, / Иже еси на небесех, / да святится Имя Твое, да приидет Царствие Твое, / да будет воля Твоя яко на небеси и на земли, / хлеб наш насущный даждь нам днесь, / и остави нам долги наша, якоже и мы оставляем должником нашим, / и не введи нас во искушение, // но избави нас от лукаваго.
Священник, возглас: Яко Твое есть Царство…
Поем: АМИНЬ. Богородице Дево, радуйся, / благодатная Марие, Господь с Тобою, / благословенна Ты в женах / и благословен Плод чрева Твоего, // яко Спаса родила еси душ наших.
Чтец: Приидите поклонимся Цареви нашему Богу. Приидите поклонимся и припадем Христу, Цареви нашему Богу. Приидите поклонимся и припадем Самому Христу, Цареви и Богу нашему.
Верую во Единаго Бога Отца, Вседержителя, Творца небу и земли, видимым же всем и невидимым. И во единаго Господа Иисуса Христа, Сына Божия, Единороднаго, Иже от Отца рожденнаго прежде всех век, Света от Света, Бога истинна от Бога истинна, рожденна, несотворенна, единосущна Отцу, Имже вся быша. Нас ради человек и нашего ради спасения сшедшаго с небес и воплотившагося от Духа Свята и Марии Девы и вочеловечшася. Распятаго же за ны при Понтийстем Пилате, и страдавша и погребенна и воскресшаго в третий день по Писанием. И восшедшаго на небеса, и седяща одесную Отца, и паки грядущаго со славою судити живым и мертвым, Егоже царствию не будет конца. И в Духа Святаго, Господа Животворящаго, Иже от Отца исходящаго, Иже со Отцем и Сыном спокланяема и сславима, глаголавшаго пророки. Во едину святую соборную и апостольскую Церковь. Исповедую едино крещение во оставление грехов. Чаю воскресения мертвых, и жизни будущаго века. Аминь. Аще Великий Пост, псалом 50-й:Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего и от греха моего очисти мя, яко беззаконие мое аз знаю и грех мой предо мною есть выну, Тебе единому согреших и лукавое пред Тобою сотворих, яко да оправдишися во словесех Твоих и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси, безвестная и тайная премудрости Твоея явил ми еси. Окропиши мя иссопом и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен, сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношения и всесожегаемая; тогда возложат на олтарь Твой тельцы. ЗАПЕВЫ (поем за священником, или чтец, с поясными поклонами): Пресвятая Троице, Боже наш, слава Тебе. Пресвятая Богородице, спаси нас. Святителю отче Николае, моли Бога о нас. Святии Царственнии мученицы и вси Новомученницы и исповедницы Церкви Русския, молите Бога о нас. Преподобные отцы наши Зосимо, Савватие и Германе, молите Бога о нас. Преподобные отцы наша Сергие и Серафиме, молите Бога о нас. (Аще изволися, возглашаем ныне празднуемому святому). Вси святии, молите Бога о нас. (Аще священник:Слава: поем: и ныне:) И поем тропарь дня или Двунадесятого праздника – до отдания или великого святого, или Триоди (см. приложение):
В понедельник, святым Бесплотным силам, глас 4: Небесных воинств Архистратизи, / молим вас присно мы недостойнии, / да вашими молитвами оградите нас / кровом крил невещественныя вашея славы, / сохраняюще нас припадающих прилежно и вопиющих: / от бед избавите нас, // яко чиноначальницы вышних сил.
Во вторник святому Иоанну Предтече, глас 2: Память праведнаго с похвалами, / тебе же довлеет свидетельство Господне, Предтече: / показал бо ся еси воистину и пророков честнейший, / яко и в струях крестити сподобился еси Проповеданнаго. / Темже за истину пострадав радуяся, / благовестил еси и сущим во аде Бога явльшагося плотию, / вземлющаго грех мира // и подающаго нам велию милость.
В среду и пяток Честному Кресту, глас 1: Спаси, Господи, люди Твоя / и благослови достояние Твое, / победы на сопротивныя даруя // и Твое сохраняя Крестом Твоим жительство.
В четверток святым апостолам, глас 3: Апостоли святии, / молите милостиваго Бога, / да прегрешений оставление // подаст душам нашим. И свт. Николаю Чудотворцу, глас 4: Правило веры и образ кротости, / воздержания учителя / яви тя стаду твоему / Яже вещей истина, / сего ради стяжал еси смирением высокая, / нищетою богатая, / отче священноначальниче Николае, / моли Христа Бога // спастися душам нашим.
В субботу всем святым, глас 4: Иже во всем мире мученик Твоих / яко багряницею и виссом, / кровьми Церковь Твоя украсившеся, / теми вопиет Ти, Христе Боже: / людем Твоим щедроты Твоя низпосли, / мир жительству Твоему даруй //
Чтец: Молитва святому Ангелу Хранителю: Ангеле Божий, хранителю мой святый, живот мой соблюди во страсе Христа Бога, ум мой утверди во истиннем пути, и к любви горней уязви душу мою, да тобою направляем, получу от Христа Бога велию милость. (Здесь чтем Евангелие с обычными опевами или иное из Писания) И поем молитву Пресвятой Богородице, глас 6: Поем: Милосердия двери отверзи нам, / благословенная Богородице, / надеющиися на Тя, да не погибнем / но да избавимся Тобою от бед: // Ты бо еси спасение рода Христианскаго.
Священник или чтец: Господу помолимся.
Поем: ГОСПОДИ, ПОМИЛУЙ.
Чтец:Преблагий Господи, низпосли нам благодать Духа Твоего Cвятаго, дарствующаго смысл и укрепляющаго наши силы, дабы внимающе преподаваемому нам учению, возрасли мы Тебе, нашему Создателю, во славу, родителем же нашим на утешение, Церкви и Отечеству на пользу. И поем: АМИНЬ. Достойно есть яко воистину / блажити Тя Богородицу, / присноблаженную и пренепорочную / и Матерь Бога нашего. / Честнейшую Херувим / и славнейшую без сравнения Серафим, / без истления Бога Слова рождшую // сущую Богородицу Тя величаем.
(Аще Пасха, поем: "Ангел вопияше…" – до отдания).
Слава Отцу и Сыну и Святому Духу и ныне и присно и во веки веков. Аминь. Господи, помилуй (трижды), благослови. (Аще священник – творит отпуст по обычаю).
Чтец:Господи, Иисусе Христе, Сыне Божий, молитв ради Пречистыя Твоея Матере, преподобных и богоносных отец наших и всех святых помилуй нас. Поем: АМИНЬ. (Аще Великий Пост, присоединяем и молитву св. Ефрема Сирина: «Господи и Владыко живота моего…» с поклонами).
|
|